رنة أمي .. بقلم الشاعر / عاطف كبارة
رنة أمي ...
عاطف كبارة
أول يوم من غير أمي
صحيت من نومي
غيرت هدومي
من بعد صلاة الصبح نزلت افتح دكاني
نفس بداية يومي امبارح
بنفس مكاني
تلئيمة شاي وباكو بسكوت
حتة فحم وكرسي معسل
ليه شايف كل الدنيا سكوت
حاسس إني غريب ومكسل
نفس بداية يومي امبارح
هوا دا وقتي بنفس مكاني
بس ف قلبي في شيء جارح
حاسس إن في حاجة نقصاني
رنة أمي ...رنة أمي
رنة أمي الساعة ١١
تشبه صوت زغرودة الفرحة
يضحك لها وشي ويتباشر
وألقى الدنيا عروسة بطرحة
أيوه يا عاطف فينك يبني
أيوه يا أمي انا ف الدكان
مجيتش امبارح ليه وسايبني
اتأخرت ف شغلي وتعبان
عاملة إيه يا جميلة الشكل
بتحسن خد بالك من نفسك
مش صحتك انا قصدي الأكل
ضحكت قالت يخرب عقلك
أختك ليديا بتعمل بامية
دي بتضحك جنبي و سمعانا
حتى أماني أختك جاية
هاتلي خميس يتغدى معانا
خالتك جايبالك بلح اسود
هي تملي عارفة مزاجك
حستناك لا تروح ولا تحود
جبتلك الناقص ف علاجك
ربي يخليكي ويرضيكي
ويصونك لينا ويحميكي
ياما أنا بتشعلق ف رضاكي
وبعمري وروحي أفديكي
فاكرة يا غالية
لما كتبت الشعر بإسمك
يومها الدنيا
كانت نور مخلوق من رسمك
أمي الحبيبة
بكتبلك جواب الحب من قلبي
ولو أقدر أخلي الحبر في قلمي
يكون دمي
شوية عليكي والله
سنين عمري اللي فضلالي
تكون ليكي وانا راضي
وضحكة ف وشك الباهي
تنور قلبي وتلالي
وترسم لي الهموم ماضي
فرحت ضحكت وشها نور
زي البدر جميل ومدور
ببوس إيدك
ألاقي الدنيا بيساني
في أحضانك
كأن الجنة عايزاني
يا أجمل من أجمل مكان
وجودك رحمة م الرحمن
يانبع الحب والطيبة
وجوا القلب وقريبة
يا أمي الحبيبة ...
فرحت وقفت حضنتني
وشدت وشي وباستني
لسة محتاجلك يا أمي
مش مصدق إنك نسيتي
حتى لو حتجيني حلمي
وتقوليلي انك مشيتي
برضه حكون قدام دكاني
مهما الصبر حيزهق مني
بنفس الوقت ونفس مكاني
الساعة ١١ حفضل مستني
رنة أمي ....
رنة أمي ....
عاطف كبارة
تعليقات
إرسال تعليق