إحتمال .. بقلم الشاعر / عاطف كبارة
إحتمال . . .
عاطف كبارة
إحتمال أقدر أعيش
لما تمشي وتسيبيني
إحتمال ميهمنيش
كام فاضلي من سنيني
بعد ما فاتت دقايق
من فراقنا
واختفت صحوةوجودنا واتسرقنا
عايز أقولك
إني حاسس نفس إحساس الغريق
إني شايل
فوق جبين صدري حجر
دايس على حلمي البريء
إن حزني
فوق احتمال طاقة البشر
وقلبي بيموت بالبطيء
عايز اقولك إني شايف
القمر بيطفي نوره
مش خسوف
عايز اقولك برضه خايف
بكرة نار الشمس تخمد
مش كسوف
بكرة تنسى العصافير
لحن الأغاني
والشجر يرفض رجوعها
العش تاني
أبدى موج البحر رفضه
إنه يرجع تاني شطه
فجأة غير خط سيره
من جديد .
حتى يوم الوقفة برضه
وسط ناسه ف قلب أرضه
يعدي زيه زي غيره
مش سعيد .
النهاردة كل حاجة إتغيرت
بعد ما مشيتي بدقائق
كل قوانين الحياة إتكسرت
المستحيل بيصير حقايق
ماتصدقيش لو حد قالك
إني عايش
هوا شاف صورة جبل
من قش هايش
واقف يعافر واللي سانده
من الوقوع
حبة سراب من وهم حلم
إسمه الرجوع
بس بكره برضه حمشي
تحت بيتك
وألتمس ضحكة عنيا
لو لمحتك أو لقيتك
بكرة نور الصبح يبدأ
من عنيكي
وأتصدم لما أكتشفني
مش لاقيكي
وأفضل أسأل عن إجابة
ميت سؤال
حقدر أكمل ولا درب
من الخيال
والإجابة كتابة باينة
ف نني عيني
كل مااهرب منها
دايما بتلاقيني
إحتمال مقدرش اعيش
لما تمشي وتسيبيني
إحتمال ميهمنيش
كام فاضلي من سنيني
إحتماااال ....
عاطف كبارة
تعليقات
إرسال تعليق